إعلان هام

ابتداء من هذا الشهر اللعين - ولابلاش علشان نهى محمود ماتزعلش - لكنه ليس فضيلا على أية حال، سوف نقوم بنشر باب بعنوان "ماحدش" وفكرته جاية من الأفراح البلدي بتاعتنا.. قال يعني عندنا أفراح افرنجي!..مش عارف ممكن يبسط مين ويزعل مين لكنه أكيد هايزعل "ماحدش".. تحياتي

إلحقووووووووووووني اتسرقت

صحيت الصبح.. لقيت مراتي بتزعق،
قال إيه؟ الغسيل اتسرق؟
يانهار اسود؟
ومين اللي سرقه..
أكيد الأمريكان..
والأمريكان هايسرقوا غسيلنا ليه..
علشان يعايرونا بيه..
ويعايرونا ليه..
علشان عندنا حاجات وسخة..
وعندنا حاجات وسخة ليه..
حكمة ربنا بقى، إعترض؟..
طب وليه مانضفنهاش.. علشان ماعندناش وقت..
وماعندناش وقت ليه..
هو انا هاحمي العيال وأكلهم واوديهم المدرسة وكمان عايزني أغسل وانت قاعد كده بتلعب في صوابع رجليك ولا نايم وبتحلم أكيد بست تانيه..
هو انت كنت دخلت أحلامي..
عينيك بتلعب وانت نايم..مانت راجل مبصبصاتي..زي عينيك بتلعب وانت صاحي مع الستات الحلوين..
وهو أنا متجوز واحده وحشه..
قول لنفسك؟..
خلينا في الغسيل..
مافيش هدوم تروح بيها الشغل..
ليه ماعنديش غير الهدوم اللي كانت على الحبل ..
كنت غاسله هدومك كلها..
كلها..
أيوه كلها..
كلها كلها؟؟..
أمال كلها نصها..
يعني أنا دلوقت ماحلتيش غير البيجامة اللى أنا لابسها..
أيوه، علشان تترزي وتتهد وتقعد في البيت..
نهضت صارخا وأنا ألعن الأمريكان الذين سرقوا ملابسي وتركوا لي زوجتي الحبيبة