August 1, 2007

إلحقووووووووووووني اتسرقت



صحيت الصبح.. لقيت مراتي بتزعق،
قال إيه؟ الغسيل اتسرق؟
يانهار اسود؟
ومين اللي سرقه..
أكيد الأمريكان..
والأمريكان هايسرقوا غسيلنا ليه..
علشان يعايرونا بيه..
ويعايرونا ليه..
علشان عندنا حاجات وسخة..
وعندنا حاجات وسخة ليه..
حكمة ربنا بقى، إعترض؟..
طب وليه مانضفنهاش.. علشان ماعندناش وقت..
وماعندناش وقت ليه..
هو انا هاحمي العيال وأكلهم واوديهم المدرسة وكمان عايزني أغسل وانت قاعد كده بتلعب في صوابع رجليك ولا نايم وبتحلم أكيد بست تانيه..
هو انت كنت دخلت أحلامي..
عينيك بتلعب وانت نايم..مانت راجل مبصبصاتي..زي عينيك بتلعب وانت صاحي مع الستات الحلوين..
وهو أنا متجوز واحده وحشه..
قول لنفسك؟..
خلينا في الغسيل..
مافيش هدوم تروح بيها الشغل..
ليه ماعنديش غير الهدوم اللي كانت على الحبل ..
كنت غاسله هدومك كلها..
كلها..
أيوه كلها..
كلها كلها؟؟..
أمال كلها نصها..
يعني أنا دلوقت ماحلتيش غير البيجامة اللى أنا لابسها..
أيوه، علشان تترزي وتتهد وتقعد في البيت..
نهضت صارخا وأنا ألعن الأمريكان الذين سرقوا ملابسي وتركوا لي زوجتي الحبيبة

1 comment:

Anonymous said...

أستاذي العزيز أهنيك على هذا الموقع الجميل واختيارك لاسم تسابيح ليكون اسمه لانى اعلم أن تسابيح اجمل شئ في حياتك ربنا يباركلك فيها اما بالنسبة للقصة فهي رائعة وجميلة ومضحكة بس عايزة اقولك حاجة مش الأمريكان بس اللي بيسرقوا هدومنا كمان اللي في البلد بيسرقوها أيضا يعني بنتسرق من كل ناحية وواقفين مكتوفين الأيدي ليس عندنا وقت لندافع عن أنفسنا ونكون في أحسن حال عن اللي احنا فيه تحياتي آية سعودي