January 27, 2008

عمار يامصر بكتبك وفنانينك




من حقائق الحياة الثقافية أن معرض الكتاب يعقد الآن بأرض المعارض..
أعتقد أن تنظيم رحلة بسيطة للمعرض لن تكلف الكثير، أيضا أعتقد أنه من المهم لجميع الأخوة والأصدقاء أن يقوموا بالزيارة وأكثر من مرة إذا لزم الأمر، كنت في زيارة أمس وذهبت لمعرض الإمارات وكان جميلا ومنظما للغاية، بشكل يذكرنا بفشلنا في تنظيم أي شئ، ماعلينا حصلت من هناك على ثلاثة كتب أحدهم لهيرمان هيسه الحاصل على جائزة نوبل للآداب 1961 حيث له رواية ضخمة هي الكرة البللورية، وعلى كتاب عن الأدب الإسباني الحديث وثالث عن تاريخ هيرودوت، المشكلة أنهم كانوا غاليين جدا، لكن الإفلاس حالة شبه دائمة لمحبي اقتناء الكتب وقرائتها، طبعا الهيئة المصرية العامة للكتاب أرحم مليون مرة، يمكنك الحصول على عدة كتب بعشرة جنيهات، آي والله ، عمار يامصر..

من الحقائق الثانية أني حضرت أول أمس مسرحية ينتهي عرضها اليوم عنوانها "مستر بيدرمن ومشعلو الحرائق" لكاتب ألماني رائع هو ماكس فيشر وفيها يتم محاكمة النظام الرأسمالي كله، من خلال مستر بيدرمن الذي سولت له نفسه الاستيلاء على اختراع أحد موظفيه।
أعجبت للغاية بتمثيل كل رامي الطنباوي في دور مستر بيدرمن، والممثل الشاب (المصارع) أحمد أبو عميره، والمشكلة إن التذكرة بخمسة جنيه (عمار يامصر) ومع ذلك وعلى الرغم من أن عدد المقاعد المخصصة للجمهور لاتزيد عن خمسة عشر كرسيا، فإن عدد الجالسين لم يتجاوز الثمانية، ثمانية فقط نصفنا بدعوات، عموما، أرجو من منكم أن تنتبهوا جيدا للأسماء التي ذكرتها، ينتظرها مستقبل جميل جميل جميل
عماااااااااااااااااااااار يامصرررررررررررررررر والله العظيم!!!!

الصورة من :

11 comments:

كريم بهي said...

لا كدا الحمد لله
طمنتنى والله
يعنى اطمن واقول عمار يا مصر
واغنى اغنية يبقى اكيد اكيد فى مصر
وهى دى الحلوة مصر
وتحيا يا دكتور مصر
مصر هى امى ونيلها يبقى دمى

بس ممكن تقولى عنوان معرض الامارات دا
ممكن؟؟؟؟؟؟؟؟؟؟؟؟؟؟؟؟؟؟؟
انا بكون مبسوط اوى لما ازورك يا دكتور
وممكن تبعتلى على الايميل دا ايميل حضرتك عاوز اتكلم معاك بعيد عن المدونى ياريت
kba_1989@yahoo.com


karim bahi
with my love

نبضات said...

بصراحه انا لسه ماروحتش المعرض الى الان لضيق الوقت بس ان شاء الله ارتب رحله مع صديقاتى للمعرض لانى من عشاق معرض الكتاب وبحب اروحه اكثر من مره
فالقراءه شىء مهم جدا مثل الطعام
والانسان الذى لايقراء انسان ميت والقراءه تستحق فعلا التضحيه بالمال وفى مقدمة الاوليات وبعدها شرائط وسديهات الموسيقى طبعا بالنسبه لى
وانا كل سنه بروح المعرض وطبعا بفلس يعنى مش حضرتك بس اللى بتفلس ولكن كل عشاق القراءه ومش بقدر اجيب كل اللى كنت عاوزه اشتريه فاقول لنفسى لازم السنه الجيه احوش مبلغ محترم جدا لمعرض الكتاب ولكن دائما خططى بتفشل
واول حاجه حشتريها ان شاءالله رواية حضرتك وايضا عاوزه اشترى كتب لتوفيق الحكيم لانى فى كتابين له عاوزه اشتريهم. وطبعا مش بيفوتنى زيارة سور الازبكيه فى معرض الكتاب الذى لا انسى ان ازوره فى كل زياره لى لتفحص الكتب القديمه واسعاره بتعجبنى جدا وخصوصا انى بشترى منه كذا عدد لمجلة البيت التى اعشاقها ليس لانها مجلة ديكور فقط ولكنها فعلا مجله جميله وراقيه وموضوعاتها بتجذبنى

وعمار يامصر بكتبك وفنانينك

تحياتى

fatima said...

د.زين
أشاركك الرأى و سأذهب غا مع صديقة من أيام الجامعة -القرون الوسطى- وبصراحة انا لما بأروح بيجيلى حالة نفسية غريبة ..سعادة غامرة يعقبها أحساس بالمرارة لأنى مقدرش أجيب كل كتاب قصادى وأنى عاوزة الف عمر على عمرى عشلن أقرى كل كتاب ..أنا كنت بقول لأبنى أنى لما أدخل الجنة - دا طبعا بعد ما أحود ع النار و اقعدلى فيها ييجي الفين سنة كدا - هبقى أطلب من ربنا يكافئنى بأنى أقرى كل الكتب الى اتوجدت عل الكون من اول ما أتخلق لغاية ما يفنى..وكمان يعملى ألة زمن أبتدى بيها الزمن أنهيه وأتفرج على كل الى فاتنى ..أظن دا يديلك فكرة عن الاحباط الفظيع الى بيحصلى فى المعرض..لكن أهو شىء أحسن من لاشىء و الفرجة متعة برضه اذا الميزانية خذلتنا
أنا كتبت انطباعى عن دماء أبوللو فى
ro7albmama.blogspot.com
أرجو أن تراها وتقبل تحيتى البسيطة
سلام

لماضة said...

اخيرااااااااااا
لاقيت حد بيقول عمار يا مصر
ياه والله ده انا زورى تعبنى من كتر ما بقول يا جماعه شبابنا جميل وفيه الخير
ارجوكوا بلاش الصور والامثله السيئه اللى بتجيب ورا
تحيه كبيره ليك يا دكتور

Zain said...

العزيز الكريم البهي
عمار يامصر رغم كل شئ.. بس الحكومة شكلها هاتبهدلنا في الأسعار..بس مصر عمار بناسها..
معرض الإمارات داخل معرض الكتاب نفسه في أرض المعارض بمدينة نصر، وأعتقد إنها في سراي 3..
الميل بتاعي أهو وأهلا بيك دائما أيها الشاعر الجميل
zhady_411@yahoo.com
تحياتي وتمنياتي

Zain said...

العزيزة الممتلئة بالفن الجميل والموسيقى نبضات
كلنا طبعن مفلسين من المعرض، وباعتذر لك مقدما عن سعر الرواية، ولكن التساهيب ب 2 جنيه في الهيئة المصرية العامة للكتاب إن ماكانتش خلصت
معلش..ممكن أسلفك أو تسلفيني
(-:
خالص محبتي

Zain said...

العزيزة جدا فاطمة
يعني هو اتقال " ومامن منكم إلا واردها"
هي الحقيقة داخلينها داخلينها، بس مش عندي ثقة في رحمة ربنا.
على أية حال، عايزين مليون مش ألف بس أنا أقدم لكم نصيحتي بالنسبة للمعرض، عدي الأول خدي فكرة -غذا كان فيكي رجلين للمشي- حددي اللى ممكن تشتريه واعملي قائمة بالأسعار، وبعد كده حطي ميزانيتك وشوفي تستبعدي إيه، وبعدين لفة تانية واشتري..
أجمل الأماكن اللي ممكن تشتري منها:
الهيئة المصرية العامة للكتاب (أرخص مكان في الدنيا)
دار المدى السورية (أغلى مكان في الدنيا بس ترجماتهم تستاهل)
أي حاجة بعد كده تستاهل
..
هاأزورك حالا وأحط على القائمة وألف ألف ألف مبرووووووووووووووووك
خالص تحياتي وتمنياتي

MKSARAT SAYED SAAD said...

يا بوب
على فكرة مصر مش وحشة
احنا اللي مخلينها وحشة

بس انت ايه رأيك ايه الاحلى
مصر ولا التمر حنة
----
عين بتغمز
----
سيد سعد

أم موني said...

أستاذي العزيز أنا حقيقي زعلانة اني مش في مصر علشان احضر ندواتك عن رواياتك لكن على العموم ملحوقة بإذن الله بالنسبة لكلامك عن مصر فأنت أدرى مني بانه مايعرفش قيمة بلده إلا المتغرب عنها لانها بتوحشه جدا واللي عايش فيها عمرها مابتوحشه لانه عمره مابيحس ببعده عنها وفعلا عمار يامصر خصوصا في الكتب واسعارها احكيلك حكاية حصلت لي من كام شهر في معرض أبوظبي الدولي للكتاب مريت عند الكتبة الأكاديمية ولقيت كتاب من كتبك المعروفة عن المكتبات وكنت اشتريته ايام الجامعة لانه كان مقرر علينا بحوالي 30 او 35 جنيه مش فاكره بالضبط يعني من حوالي 6 سنين تقريبا المهم اول ماشفت الكتاب فرحت جدا وهو لسه معايا هنا طبعا بس حبيت اشوف سعره تخيل لقيته بكام لقيته بـ 65 درهم عارف يعني بحوالي كام جنيه تخيلوا معيا كده بحوالي 90 جنيه فعلا عمار يامصر وعلى فكرة احنا بلدنا حلوة اوي ومن اكتر الاغاني اللي بتوجعنا في الغربية اغنية شيرين اللي بتقول ماشربتش من نيلها طب جربت تغنيلها جربت في عز ماتحزن تمشي في شوارعها وتشكيلها غالية بلدنا علينا وهاتفضل في عنينا ومادام بنحب بلدنا تبقى هاتتغير بايدينا احنا اللي نعليها بايدينا نخليها اجمل لينا ولولادنا مهما العمر يعدي علينا دور جواك تلقاها هي الصحبة وهي الأهل ........ بس اللي مجرب وفارقها قال في الدنيا مافيش بعديها

Zain said...

والله ياهبهب وانتي كمان
أخبار موني إيه..
على فكرة أنا بطلت تأليف كتب علمية من سنتين وماعرفش حاجة عن أسعار كتبي العلمية وحياتك ولا بتتباع فين.. وعموما الروايات أرخص بكتير للمؤلف والبائع والشاري..
مين مايحبش مصر ياهبهب.. مهما كان اللي فيها..مهما كان وحياتك!!!
تحياتي وقبلاتي ليكي ولموني

shreen said...

د. زين
زيارة معرض الكتاب دى شئ مقدس عندى
من وانا عندى 7 سنين
ما فيش سنه من ساعتها فاتت الا وزرت المعرض

واحيانا اكثر من مره
انا ما بلاقيش نفسى غير فى مكانين
الاول معرض الكتاب

والثانى : من غير ما حضرتك تضحك عليا
فى جنينة الحيوانات رغم كرهى انى اشوف حيوانات فى قفص

الا انى باحب جدا اكون قريبه من مكان فيه حيوانات

تناقض هو ربما
لكن هى الحقيقه

تحياتى
د. زين