January 20, 2008

مابين الأرنب والدب







هل تحب!



من الغريب أنك عندما تحب فإنك غالبا ماتهدي حبيبتك دبا أو أرنبا ناعما، ولكل من الدب والأرنب معنى مختلف، ولكن عادة مانغفل هذا الأمر إذ يجذبنا لون اللعبة، ونعومتها، معلنين عن رغبة ذكورية في الكرم، ولاأخفي عليكم أن المرأة تحب ذلك، فعدد الدببة والأرانب التي يمكن الحصول عليها كهدايا في العمر يمكن عدهم على اليد الواحدة، عموما أحب أن أطمئنكم بأن الأمر كله فاسد، هيا رددوا خلفي



فاسد



ف..ا..س..د




الصورة من :
rabbitize.com/rBoutique/rItems/

18 comments:

نبضات said...

ليه بس فاسد !! لا اتفق لااتفق لا اتفق انا مختلفه معك يادكتور هذه المره
انا من الناس اللى بحب الى هذا اليوم ان اهدى بالورود او شرائط وسيديهات الموسيقى وليس الاغانى او الدباديب لان معانيهم جميله وبحب برده اهديها لمن احبهم واختارها بعنايه شديده وبتفرق معايا أرنب ولا دب اهم من النعومه ثم الالوان ثم فى الاخر نعومتهم و بميل اكثر للارانب مش عارفه ليه يمكن لانى اشعر ان الارنب رمزا للطيبه
بس كلها رموز جميله لانى كل ماارى هذا الشىء بفتكر مين احضره لى فبتكون عندى رموز للاشخاص اصحاب هذه الهديا كما انها من الهديا التى تبعث البهجه فى نفسى . بصراحه ..من اجمل الهدايا يمكن لان شخصيتى بتميل اكتر للطفوله اللى بيعلقلى عليها كل من يعرفنى وعلى فكره على قد مابتضايق ساعات من هذا التعليق ولكن بيشعرنى انى لسه محتفظه ببرائتى رغم مرور السنوات ... مش عارفه ايه سبب حبى لهذه الاشياء وبشده ويمكن كمان اغلى عندى من اى هديه ممكن تكون مفيده فى حياتى

تفتكر يادكتور زين ان كلامى دا يستوجب
ذهابى لدكتور نفسانى لمعرفة سبب ارتباطى الشديد بهم!!!

تحياتى

كراكيب نـهـى مـحمود said...

لدي عشرات الارانب والدباديب كلها غاليه عندي غارقه في روائح الحب والود والاهتمام من ابي وامي واصدقائي
لكن ذلك الارنب الدبدوب المنتظر لم يات بعد
ردد معي يا رب يجي
قال فاسد قال
محبتي

MKSARAT SAYED SAAD said...

بوب صباحك سكر
من قال ان الامر فاسد ومن قال ان الهدف هو نوع الهدية المقدمة

قيمة الهديه ارها هي الهدف ومتهيألى سعرها كمان :)

عارف يا بوب اجمل حاجة في الهدية انها مش دبدوب ولا انها ارنب
اجمل حاجة انها ذكري وعلى فكرة
في كمان قرود هديه
ودلوقتى بقى في اشكال والوان
للهدايا بس مقدرشي
اقول على الذكري انها فاسدة
صعب جدا عليا
لكن اللي اقدر اقول علية فاسد وبشدة وممكن اعمل مظاهرة عليها
هو جواز عتريس من فؤادة دة بقى فاسد وباطل وكل اللي انت عايزة
تحياتي لقائد الثورة
سيد سعد

fatima said...

العزيز د.زين
1- بنظرة تاريخية سريعة الدباديب لم تكن متناولة فى ايدينا ماقبل التسعينات وكانت عجبة فى الايد تشوفها فى الافلام الاجنبى او تجيلك من بره هدية او تشتيريها من هنا بمرتب شهرين على الاقل..حتى جاء ت الاخت عولمة و العالم الى بقى قرية صغيرة والكلام الى انت عارفه ده ورخصها لنا الاخوة الصينيون كتر خيرهم فبقت متاحة و ممكن تتهادى لكبير وصغير
2- انت بتتكلم بدافع ذكورى رجالى بحت ..مع ان البنات بيشتروه لحبابيبهم والستات بتهديه لصديقاتهم والامهات بتجيبه لولادهم واولاد قرايبهم انا شخصيا جبت ارنوب صغير لأمى فى عيد الام عشان يمسك لها زازة البرفان أل يعنى هوه الى جايبها و بيديهالها.. يعنى دا يمكن الجنس الناعم - كلاسكيكا اللقب ده موش حقيقة مؤكدة يعنى - هوه الى بيقبل على شرائه اكتر منكو ..زى نبضات ونهى وغيرها بيقدرو معناه و يحسوه اكتر
3- المشكلة موش فى الدباديب ..المشكلة فيمن اهداك الدبدوب وطلع هوه أونطة..العيب فى حبايبكوا موش فى دباديبكو..
4- مين الى مضايقك قوى كده وجايبلك احباط خلاك تخبط فى شوية حتت الفرو الغلبانة دى وتطلق عليها هذا الوصف ..
لأ دا انت بتحرضنا نعمل عليهم روبطية وكمان نهتف؟؟!!
حرام عليك يا شيخ
روق اعصابك
تحياتى من اعماق القلب

عين ضيقة said...

يظهر انك لقيته غالى اوى

عموما ممكن نسلفك
ههههههههه

انا شايفة انه كهدية اصبح بالاعتياد يعنى اعتدنا ان الهدايا تكون دباديب وعرايس مابنفكرش حتى نبص على شىء تانى فى نفس المحل

جرب تبص لشىء تانى طالما الدباديب فاسدة

ويارب كل اللى يجيبلك هدايا تكون دباديب وارانب

كل سنة وانت طيب بقى

إيمان said...

يااااااااااا دكتور ...مش مهم فاااسد ولا لأ المهم يبقى فيه ارنب أو دب متفرقش...

بس هو لية فااااااااااسد

تحيتى ومودتى

كريم بهي said...

د زين
الحبيب المحبوب
اتمنى تكون بخير اولا
انا انتهيت من الامتحانات وعدت
لكن مش عارف ليه بتعتبر الهدايا الدباديب والارانب فاسدة
يمكن عشان الرجل اتجه لذكورته والكرم والملمس بس
ونسى المعنى ولحب
يمكن!!!!
بس المحبوبة بتقبل الحب بكل الوانه واشكاله
واهم حاجة المعنى
اقصد يكون الحب موجود

اتمنى لو تزورنى
كريم بهي

Zain said...

تعليق وحيد لأهل المعارضة
الحقيقة كل الناس واضح ويمكن وربما ولعل واحتمال ماخدتش بالها أنا بأوجه الكلام لمين، بأوجه الكلام لكل الناس اللي قصص حبهم بتبقى فاشلة، ويتبقى منها دبدوب أو أرنب، في الحالة دي ماتبقاش ذكرى تبقى عملية فاشلة، لأن ذكريات الحب الفاشل لعينة للغاية مهما كانت حلوة، آخرة الحلاوة إيه، مر.
بالنسبة لي أنا بقى فأنا إبنتي تملك ثلاثين دبا وأرنبا وقردا وحمارا وغزالا ونمرا، كلهم في غرفتها، وأحيانا مايستعمرون غرفتي، بل يصل الأمر إلى طردي من السرير، لكني سعيد بهم وبها، خاصة حين أنام على الأرض وأتطلع إليها بعد أن تقوم بعزالها ويفترشون سريري، فأراهم يحتضونها وهي مغمضة العينين يضحكون لي في خبث جميل، فأنام، أحب ألعاب إبنتي.. صحيح..لكن المسألة كلها فاسدة لأني بأبقى نايم على الأرض في هذا الشتاء الزمهرير، ويبدو إن رسالتي وصلت خطأ..نعتذر عن الخطأ غير المقصود وتحياتي لكم جميعا في الزمهرير..
زين

maii omar said...

دباديب الطفولة يا دكتور زين تبقى ذكرياتها إلى الأبد..دافئة..بريئة

أما دباديب العشق..فإنها تتحول إلى وحوش بغيضة عند إنتهاء علاقة فاشلة

أسجل إعحابي قبل مامشي بدماء أبوللو..عشت معها حالة رائعة..كان واحشني أعيشها أوي..ألف مبروك الرواية
وأعتقد بنتك تستحق دبدوب جديد بالمناسبة دي
:)

نوراى said...

د\ زين هاى
الدب والارنب اكيد هدايا جميلة بتفرح بيهم البنات لكن الاجمل من كل دة انك تبقى بتدى حب يفوق جمال لون الدب والارنب
وتبقى ناعم الاحساس زى ملمس الدب والارنب
وتبقى بتدى بهجة وفرحة فى قلب اللى بتحبة زى تاثير الدب والارنب
واظن ان عكس كل دة يبقى هو الفساد
واللى مش يعمل كدة يبق يبقى هو اللى فاسد
تحياتى الشديدة ليك ولقلمك

fawest said...

أقرا الان قصص بحجم راحه اليد
لكاتب اليابانى جواباتا

أستوقفتنى قصه بعنوان طائرا الكانريا
القصه كتبت 1925
تحكى عن رجل أهدت له حبيبته طائرا كانريا عند الفراق وعندما تزوج كانت زوجته ترعى له الطائرين بينما هو كل ليله يستمتع بمشاهدتهم فقط
القصه تبتدى من وفاه الزوجه فبعث الرجل الى حبيبته بخبرها الى عدم وجود أحد لرعايه الطائرين
ولكنه تذكر كلمات كتبتها له عندما أهدت له الطائرين قالت (بتصرف منى):شئ غريب أن يهدى أحدا كائن حى كتذكار و لكن فى يموم سينفق الطائرين
عنما تحين لحظه موت ذكراياتنا دعها تموت

جميله جدا القصه ومعانيها
وعلمت من مقدمه المترجم
أن الحضاره اليابنيه شديده الارتباط بالطبيعه و الكائنات الحيه حتى الحشرات

ما معنى هذا
هل الدب و الارنوب
مجرد هدايا يستسهلها الشبان لصنع الصين
و رخص الثمن بل لف وورد

أعتقد أن هذا فقط فى الظاهر
فنحن لا نريد ذكراياتنا أن تموت
وإذا أنتهت العلاقه
يكفى أن يسترد الخطيب السابق دباديبه و أرانيبه
و يجلس فى غرفته يتحسر على لحظات
أنبهرت من دبدوب بتلاته جنيه و لم تستحمل ان الشقه ضاعت عشان تلات تلاف جنيه
اؤيد دكتور زين
الدباديب فاسده فساد الذكريات الجوفاء
أنا أهديت خطيبتى السابقه بقره
أبيض فى أسود كبيره الحجم غاليه الثمن
لا تضحكوا كانت لعبه حقبقى جميله
و فى يوم فسخ الخطوبه و إخبار أهلها فى بيتهم
وكنت أنا من طلب الفسخ
لمت كل الهدايا بما فيهم البقره
وردتهم لى ولكنى رفضت
ضحكت على نفسى وأنا خارج
مهزوم و أحمل مغانمى
وإذا كنت أخذتها
فكنت أهديها لأى متسوله على الطريق بدلا من .....
فقد أصرت على أن أسترد الذهب و الفضه
وفى بيتى وزعت مغانمى على اخوتى
أنما دبدوب فلا
عندما يحين موت الذكريات دعها تموت
أليس هذا أفضل

العيب فى حبايبكوا موش فى دباديبكو

نبضات said...

صباح معطر بالورد والياسمين
انا لما قريت البوست حسيت ان ممكن حضرتك بتشير الى تجارب الحب الفاشله لان الكل اليوم بيجيب دباديب وبعدين تكتشف انهم ممكن يتنازلوا عن حبهم بسهوله او مبيحاربوش ويتمسكوا بهذا الحب فقلت ممكن يكون قصدك ان هذه الدباديب فساد لهذا المعنى
واكيد ....لما تجربه بتنتهى مهما كانت الاسباب بتكون الدباديب والهديا ذكريات مؤلمه اتفق مع حضرتك

بس ....المعنى للدبدوب والارنب جميل حتى ولو فى بشر لا يستحقوا ان يهودوا او يهدى هذه الاشياء وبالرغم من انها بتكون ذكرى مؤلمه فى بعض الاحيان

ولكن ....وجهه نظر بتاعت حضرتك انا احترمتها وفهمتها وعجبنى جدا تعليقك الوحيد على التعليقات اللى وضحت فيها انك بتحب الدباديب لدرجه انك بتتنازل عن مكانك بجانب ابنتك ليحتضونها وهى مغمضة العينين ويضحكون لك فى خبث جميل ....تعبير رائع
ووصلتنا وجهت نظرك يافندم

تحياتى

Zain said...

نبضات الساحرة
الروائية الجميلة صاحبة الكراكيب
عرب شبرا الأصليين
فاتيما منتهى الحكمة
عين ضيقة بلاش استفزاز (-:
أمونة الجميلة
كريم البهي
أصحاب التعليقات الأولى، لكم محبتي على خطوكم في طريق غير طريقي للحظات..

Zain said...

مي عمر
أولا منورة المدونة ويبدو إن فاوست شغال كويس في اقتناص أرواح البشر..
ثانيا أشكرك على اعجابك بدماء أبوللو، وأنا لسه جايب لتسابيح دبدوب وحمارين صغيرين وأرنب وغزال ماتقلقيش لو انا ماجبتش هي بتطلب دلوقت السوبر ماركت لوحدها يبعت..
شرفتيني ونورتيني
وأهلا بيكي دائما

Zain said...

نوراي
(إيه الأسماء الجميلة دي)
(نور العين يعني)
نورتي وشرفتي وأهلا بيكي،
مش كده والنبي حد مايحبش الدباديب والأرانب الصغيرة الناعمة، مشكلتها بعد انتهاء العلاقة، ماعرفش بتحتفظ بنفس المعنى ولا بتتحول للهيب ونار ودخان..كان نفسي اسمع حد منكم عمل إيه بعد انتهاء الحكاية
مرة أخرى شكرا ليكي وتحياتي الدائمة

Zain said...

الفيلسوف الصغير
يابني والله مش عارف أقولك غيه اللى انت كاتبه يستحق بوست لوحده وياريت تنشره لأن فيه كلام كتير
وياباشا شاكرين لسعادتك المغامير الحلوين اللى منورين والله
فعلا
دعها تموت
خالص المحبة ياأهل المحبة

Zain said...

نبضات الساحرة
كده إحنا رجعنا لقواعنا سالمين، أشكر قرائتك الجميلة، يعني بالنسبة لتسابيح ماقدرش اشيل دب أو أرنب من مكانه دلوقت، لأنها بتبقى قاعده في حجري ومعاها كده ييجي تلت أو أربع دباديب ومابأبقاش شايف لكن باسكت وبرضه مبسوط..حكم القوى يابنتي واللهي..بس بالأمانة بحبهم جدا.. أنا كنت بأقول بس لما تنتهي العلاقة دوروا كان دب ولا أرنب ولا حاجة تانية.. وكل حاجة ليها معنى يشير إلى أنه كان يجب أن تنتهي العلاقة..دوروا كويس..الفن هو التفاصيل الصغيرة..كما الحياة
خالص محبتي الدائمة

نوراى said...

د\زين اية اخبارك

حسيت انى لازم ارد على ردك على التعليق بتاعى فاسمحلى بشرف الرد المرة دى

اولا ميرسى على اعجابك باسمى هو اسم تركى قديم بس مش معناة خالص
"nour eye"
هو معناة طاقة من النور او طلة نورانية

ثانيا :- انتا فى الرد تسالت يا ترى الدباديب والارانب دول بعد انتهاء العلاقة تاثرهم بيبقة لسة ناعم ولا بيتحول لنار وعذاب
اقولك رائى بقة
اولا:- الحب مافهوش ضمانات يعنى مش هتدخل قصة حب وانتا متاكد مليون فى المية انها ممكن تنتهى بالنهاية السعيدة واللى هيا الجواز
بس طالما حبيت لازم تجازف ولازم تعرف انك ممكن تكون خسران واو انك تكون كسبان ودة مش بيتوقف على قوتك الشخصية انتا بس لكن بيحكمة حاجات كتير منها ترتيب ربنا واظن دة اهم حاجة
انا رائى ان الحب اهم حاجة فى الدنيا
بس الحب الصح اللى شوية فية نسبة حساب من العقل وانجح انواع الحب اللى تحبة بقلبك وتقتنع بية جدا بعقلك والقلب مش بيعارض العقل كتير

اما لقدر اللة لوالعلاقة دى فشلت وفية حالات كتير من الفشل
يا الا لقدر اللة حد من الطرفين مات:- يبقى فى الحالة دى الدباديب هتتحول لذكرة وحاجة بتفكرك بحبيبك وترجعت لذكريات حلوة فى حياتك عمرك ما هتنساها

يا الا احد الطرفين تحلى بالخسة والندالة والخيانة وعشان كدة العلاقة فشلت :- يبقى فى الحالة دى هيبقى الدباديب والارانب دى مكانهم الاساسى سلة المهملات وهتنسا من الاصل انك كان عندك دباديب ناعمة ولا هتبقة عايز تفتكر اليوم اللى انتا ختهم فيها

يا الا العلاقة فشلت لظروف تانية خالص وما اكترها
هيبقى مصير الدباديب دى غرفة من الغرف المغلقة جوة اى واحد فينا هيحط فيها كل اثار العلاقة دى من دباديب واوراق ومشاعر وهيفضل دافنها جوة الغرفة دى وقت ما يحب يرجع بالذكريات ليها هيفتح الغرفة ويقعد معاهم ويشرب معاهم الشاى كمان
ويوم ما يحب يتنساهم هيقفل عليهم الباب بالضبة والمفتاح وهيحاول يقنع نفسة انة تنساهم

يارب ما كنش طولت عليك بس كنت حاسة انة هيحصل لى حاجة لو ما ردتش