March 2, 2008

مؤتمر الرواية : برضه حاجه تفقع


بعد شوية تحايلات وخناقات وزعيق في التليفون ومحاولة عمل لوبي جامد زي اللوبي اليهودي كده وافق واحد من المسئولين على حضوري مؤتمر الرواية على اعتبار إن سني مناسب للحضور وإني مش أندر إيج وإني ممكن أفهم، على اعتبار يعني إني لسه أول مرة أظهر بين الناس الإليت دول، الحقيقة أنا بأشكره على سعة صدره وعلى سماحته لي بالحضور، وأنا مش فاهم بصراحة ليه دلوقت أنا كنت عاوز أحضر، على اعتبار إني باكتب رواية يعني ، وكان بيتهيألي وأنا رايح إني كنت عامل زي طفل رايح يركب مراجيح مثلا، وإني ممكن أغير - مانا باكتب بقى وبأحب أعيش أحلامي، وأعطي أي منظر جديد في الموضوع।


إلى هنا والأمور ماشية عال، وبعدين رحت أول جلسة وكانت ورشة عمل عن "أسئلة الرواية الآن"، واكتشفت بعد خمس دقائق من القعدة اللي حضرها الحقيقة مجموعة هايلة من الروائيين إن اللي احنا بنتكلم فيه مالوش دعوة بموضوع الورشة، وإن كل واحد بيتكلم عن نفسه وعن همومه، وفيه ناس ماعندهاش حاجة تقولها، وفيه ناس تبص في عينيها تقولك هو إحنا قاعدين هنا ليه، وفيه ناس عماله تحرق سجاير عمال على بطال، وفيه ستات روائيات مالهومش دعوة بالقضية خالص، ولما حسيت بالبتاع ده إللي إسمه إنهاك قمت خرجت للطرقة رايح الحمام بعد إيقاف الجلسة ، قابلت رئيس الجلسة، سألته سؤال عبيط كده: إنت إيه رأيك في الجلسة؟ قاللي الناس اللي جوه دي عندها شهوة للكلام، ولع، ماحدش بيسمع!!


بس خلاص!


وانتهى الموضوع وانا في الحمام باشد السيفون


خالص تحياتي للرواية

14 comments:

fatima said...

د.زين الغالى
براحةيا دكتور على أعصابك ... بس انا قريت ان الجايزة اللى راحت لأدوار الخراط كان سببها انه أكبر الادباء سنا و بالتالى نظام بقى نلحق نكرمه ... و الباقين يبقى ييجى الدور عليهم بعدين ..
صحيح ؟؟
لو دا المعيار المتبع...
يبقى عند حضرتك الف حق تتفقع ..
بس و لا يهمك ... اتصور و أرجو ان يجانبنى الصواب ..ان التكريم الحقيقى لأى مبدع بييجي من الناس اللى بتحبه ... صحيح الجوايز ليها قدرها و أهميتها ... بس برضو المعايير اللى أهديت على أساسها أهم منها هيا
تحياتى يا فيلسوف
و كفاية فقعة بقى دا هيا مرارة واحدة بس

كراكيب نـهـى مـحمود said...

صديقي الجميل د0 زين- كنت جميل ومؤثر في كلمتك لازلت اذكر منها اننا نحن اصحاب تراث الف ليلة وليله لدينا فقر في الخيال
اذكر ايضا كلمة العزب المميزة
واذكر الحاجات التانية الوحشة المزعجة التي تضايق والتي يساعدني الزهايمر النفسي في اسقاطها
ياااه حضرتك متغير ومركز على الحاجات اللي تفقع وده مش كويس للصحة خصوصا لو عايش في مصر
د0 زين تجربة شد السيفون مميزة وعامرة بوجهات النظر المغايرة تعرف ذلك
صباحك سكر وكل مؤتمر واحنا حضور محبتي

نبضات said...

الحاجات اللى تفقع فى بلدنا بقت كتير
واكتر من ثلاثيه الفقع اللى حضرتك كتابتها حتى الناس اتغيرت فى كل شىء اصبحوا اكثر سطحيه وفيروس الفوضى انتشر فى كل شىء فى حياتنا امام بخصوص ماما الحكومه مش حتكلم عشان محدش يجى يقفل مدونة حضرتك بالشمع الاحمر
تحياتى

shreen said...

د . زين
والله لو الواحد قعد يفكر ويكتب عن الحاجات اللى تفقع
مش هتكفيه لا حروف الابجديه ولا كل المدونات والصحف اللى فى الدنيا

هو اساسا بقى القاعده ان فى حاجه تفقع
والاستثناء
ان ما فيش حاجه تفقع

مثلا حضرتك لو سألتك مره واحده
قولى على حاجه تفقع

هترد على على الاقل ب10 حاجات تفقع

لو سألت حضرتك مره واحده
طب ممكن حضرتك تقولى على حاجه ما تفقعش

هتفكر الاول شويه
على ما تلاقى حاجه
ده لو لقيت من اساسه

واساسا الكلام ده كله من واحده مفقوعه على الاخر

:)

وبعدين عتاب صغير بقى على حضرتك
انت زعلان منى ؟
انت بطلت تزورنى ليه فى المدونه؟

حضرتك ضايف اسمى فى قائمه الغاليين

طيب اما انا غاليه
مش تسأل عليا

:)

كل الود والاحترام

MKSARAT SAYED SAAD said...

بوب
هو انت لسة مصمم ان ممكن الدنيا تمشي صح هتتعب مش د كان كلام ليا اوقات
واحسن حاجة انك شديت السيفون
كل اللي بتقولو ليا كل يوم بيتحقق منه حاجةواوقات كل دقيقة
بدأت ولا بلاش
عارف احسن حاجة انك شديت السيفون
تحياتي لأحلى بوب

زين said...

العزيزة فاطمة
مرارتي مفقوعة بقالها كذا يوم..هي صحيح واحدة بس الظاهر تضخمت زيادة عن اللزوم
إدوار يستاهل الجايزة من زمان وعمل واحد من أعماله يكفي زي رامة والتنين مثلا..لكن المسألة مش في الجايزة ..المسألة في السيستم..
صباح السيستم وصباح جو وصباح ليكي وأنا سيبولي عبد الحليم
محبتي واحترامي

زين said...

العزيزة نهى
ربنا يخليكي مافيش أجمل منك..
يعني انتى فاهمة الفولة وأدينا كل واحد فين في كل مرة بيشد السيفون..
مش ده أحسن حل في التاريخ المعاصر
محبتي يانهنوه

زين said...

الجميلة نبضات
كله يفقع..كله
مش دي أغنيه لأحمد عدوية
آه..فكرتيني بماما الحكومة ماتقلقيش عندنا حرية دلوقت في الكلام..وده عال
صباحك جميل

زين said...

الجميلة شيرين
أنا بأزورك والله بس أنا مشكلتي مع الكلام إنه بقالي مده مش قادر أعلق فقط تعليقين اللي تركتهم على مدار الشهر الماضي..عموما حقك علي والزيارة ليكي قريبا
وبمناسبة الفقع هو نوع من النباتات الجذرية اللي بتظهر في الصحراء وغالية جدا في الخليج..إيه رايك في المعلومة دي..الفقع محاصرنا من كل حته..
محبتي وأتمنى ان أراكي دائما على خير

زين said...

عرب المحمدي
الفقع اللي أنا أقصده غير الفقع اللي وصلك..غير الفقع اللي الناس بتتكلم عنه غير الفقع الحكومي غير الفقع الخليجي غير الفقع اللي انت عارفه
صباح البتاع

Tharwat said...

و الله فكرتني بقصيدة البتاع يا دكتور في آخر تعليق

يا للي فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟

كفايا كدا لان نجم هيفضل نجم
يا أمة ضحكت من جهلها الأمم

shreen said...

حتى الفقع
بقى غالى وبفلوس يا دكتور

ده احنا على كده نصدره

تحياتى
مع تمنياتى باللا فقع

شيماء زاهر said...

معلش أنا جيت هنا متأخر...بضم صوتي لنهى، وياسجل احترامي لحضرتك ، لاسقاطك لقب دكتور في بداية الكلام لأن على حد تعبيرك الأدب ما بيعرفش ألقاب علمية، والتزامك بالوقت إللي كان شوية نادر في الجلسة إللي حضرتها

وكل مؤتمر وتكون على خير :))

كل التحية

شيماء زاهر said...

معلش أنا جيت هنا متأخر...بضم صوتي لنهى، وياسجل احترامي لحضرتك ، لاسقاطك لقب دكتور في بداية الكلام لأن على حد تعبيرك الأدب ما بيعرفش ألقاب علمية، والتزامك بالوقت إللي كان شوية نادر في الجلسة إللي حضرتها

وكل مؤتمر وتكون على خير :))

كل التحية