February 28, 2008

حاجة تفقع : بطاقة تموين


أعلن بكامل قوايا العقلية أننا أرض خصبة جدا للعب في دماغنا
كما أننا مشروب وطني ممتاز للمسئولين عن أكلنا وشربنا
يعني أنا راضي ذمتكم لأني مفقوع جدا من كل اللي بيحصل اليومين
مش عارف قريتوا عن النية الجديدة للحكومة الرائعة في توفير بطاقة تموين جديدة للناس اللي محتاجين الدعم॥
فاخترعت اختراع رائع اسمه شهادة ميلاد رقمية من الشهادات الجديد ة اللي عاملينها علشان إيه يحصرونا!
فقوم إيه ماحصروناش! لأن إحنا شعب غاوي طوابير ! والحكومة بتستمتع جدا بوقوفنا في الطوابير! ليه.. كنوع من التعذيب غير المنظور وأيضا
لأنه بيستهلك وقتنا بشكل كبير جدا، وإحنا أساسا مابنبصش على إن إحنا نريح نفسنا، كل شوية طوابير، وده بيثبت إننا ناس الوقت عندها مالوش معنى
بذمتكم شفتم الحياة وسخة قد إيه؟
المهم استمرت حكاية الطوابير فقوم إيه لقوا قدامهم عشرة مليون بني آدم ودول اللي عرفوا
أمال اللي ماعرفوش يبقوا قد إيه؟؟
المهم الناس حتى بعد الحكومة مارجعت في كلامها وحبت تبقى حنينة الناس برضه كانت واقفة في الطوابير، سلوك معدني مالوش حل الحقيقة..
المهم يعني من الآخر فيه رسالتين لازم أقولهم:
للحكومة : بطلي مقالب في الناس
وللناس: انتم مش هاتبطلوا حاجتين، مش هاتبطلوا تصدقوا الحكومة ولا هاتبطلوا وقوف في الطوابير!!
ويا ما لسه هانشوف من ماما الوحشة اللي اسمها الحكومة!!
صباح الفقع

2 comments:

سهــى زكــى said...

الله يخرب بيت الحكومة لالالايخرب بيتنا احنا الوحشين القذرين اللى عايزين ناكل ونشرب ونعش لا وايه كمان نستحمى بصابون ونغسل شعرنا بمياه نظيفة ، يا نهار اسود لا وايه كمان ، نتجوز ونخلف عيال هما كمان عايزين كل الحاجات دى والله احنا مواطنين غير صالحين نستاهل الحرق فعلا زى الحكومة ما بتعمل معانا بالضبط ، تخيل سواق الميكروباص بيغلى الاجرة ولما تسأله ليه يقولك دا الحديد غلى يا بيه
احنا بجد لينا الحرق
معاك جاز وكبريت
هات
يالا بينا
بوووووووووووو

horas said...

نشاطركم الفقع