February 26, 2008

حاجة تفقع


مين عنده نفس للكتابة
الناس بتخر حزن لامؤاخذه
مافيش حاجة بتفرحها
هيصوا حبتين عشان كاس أفريقيا، وبعدين غمهم عصام الحضري رغم حقه الكامل في الحياة، بس ازاي يعيش واحنا حاقدين عليه ونقول ماعندوش انتماء، إزاي يعني أمال مين اللي كان واقف في جون منتخب مصر، أبويه لامؤاخذه، أنا شايف إننا مزودين المسألة حبتين، وآجي أبص على الكتابات بعد انتهاء المباريات في كأس أفريقيا، ألاقي الناس بتتكلم في الفلوس اللي خدها اللعيبة، وحاجات كده من نوع " مش كان أحسن لو بنينا مدرستين" أو اشترينا كام جاموسة للفقراء، أو فرقنا كحك على روح المرحوم اللي مات " أي حد مات، وبعض المواقع من الناس اللي مفروض إنهم أكثر ثقافة، تحط استطلاعات رأي مريبة، حاجة لامؤاخذه يعني، لامؤاخذه حاجة وسخة، أنا كان هايجيلي كساح، وإسقربوط، وملاريا، وأم أربعة وأربعين، إيه كتير إننا ندفع شوية فلوس عشان نفرح، ولاكتير الفرحة على الناس، واللي خلق الحضري ماخلقش غيره، (أقولكم إيه تيجوا نعمل منتخب وطني مننا نلعب بيه كوره وياخد كاس أفريقيا بدل اللعيبة دول)..
ياخلق ماتستكتروش تمن الفرح على الناس..
حاجة تفقع!!
ملحوظة:معلش يانوراي هي كانت طالبة حزن بس النهارده أحسن
الصورة من:
www.ahlydevils.com

6 comments:

كراكيب نـهـى مـحمود said...

نحن شعب لا يجيد الاستمتاع
بنخاف لما نضحك فنقول ربنا يجعله خير
ولكن الحزن حق مشروع
ايها الحزن منور
كده تمام يا دكتور وحشتني جدا

maii bahaa said...

هيه تفقع بس؟؟ دي تفقع وتقلب البطن كمان
لأ وفي ناس اتهمته بالخيانة العظمى
وطالبوا بسحب الجنسية منه؟؟؟

احنا كده ننسى الحلو في لجظة
ولا كأنه عمل حاجة
عجبي

مفقوعة زيك
:(

لماضة said...

والله يا دكتور عندك حق
ليه منفرحش قبل الفرحة ما يغلى
ولو حتى غلت وبقت بفلوس خلينا نشتريها عشان نقدر نعيش
انا مستغربه جدا رد فعل الناس
وكانه حق مكتسب ولا كانه ليه حق يشوف الاحسن ليه ولبلده
رغم الحاجات الحلوة الى فرحنا بيه
مش من حقه يفرح

fatima said...

د.زين الغالى
حضرتك مزعل نفسك ليه؟؟
الكلام الكتير دا سببه سبوبة الفضائيات و ملء البرامج بأى حاجة و خلاص بس نجيب اعلانات ...
و لا السياسة الإعلامية البديعة الى احنا عايشينها ...
لاعب الكرة أصبح هو المثل والقدوة ... و كأن هو دا غاية المراد مع ان الكرة فى نهاية المطاف مجرد لعبة .. هدفها الأساسى الترويح و شغل الفراغ بما يفيد و لا يضر ..
عارف حضرتك
انا ساعات بخاف لكون من غير ما قصد ضريت يوسف انى خليته يحب الكورة و يشجع اللعبة الحلوة ... لحسن لما يكبر يقولى عاوز اطلع لعيب كورة و يبقى زى المناظر الى بنشوفهم الايام دى
تفتكر حضرتك لو كان عندنا أهتمام عام بأشياء أخرى زى العلم
و لا الاداب و الفنون
و لا الصناعة
و لا الزراعة الى نسيناها ..
كان هيبقى عندنا وقت نعرف فيه
مين حتى عصام الحضرى دا و بيشتغل ايه؟؟
قاتل الله الفراغ يا دكتور
تحياتى الخالصة

sad_doraa said...

احنا شعب منحوس :]
تحياتي

نوراى said...

د\ زين

اية اخبارك

اة هيا كانت طالبة حزن بس بدام لاقينا حاجة تفرحنا لية مانفرحش

بص يا دكتور الناس بتجيد فن الحزن والكابة

حتى فى عز الفرحة بنفكر فى مليون حاجة ممكن تضيع الفرحة دى

على فكرة احنا هنا فى ابو ظبى بهدلنل البلد لما فوزنا بالكاس المصريين والامارتيين كمان كنا فى الشارع وبنهيص كان بجد يوم تحفة

ملحوظة:- معلش يا دكتور هيا كانت طالبة حزن بس نعمل اية بقة ممكن اعوضها لك فى تعليق تانى

دومت دايما بكل حب

نوراى