March 30, 2008

الألم ..والضحك


أصعب الآلام


ماتقوليش آلام السنان


ماتقوليش آلام الكلى


ماتقوليش الصداع


قوللي حاجة تاني


طيب ماتزعلش قوي كده اسمع ياسيدي


بالليل كنت باشترى دوا لبنتي من صيدلية في العباسية ، هاتقوللي إيه اللي وداك العباسية وانت في الهرم، اقولك اني ماكنتش لاقيه والساعة جت ثلاثة ونص الفجر تقريبا، السكة بقى من الهرم للعباسية فيها 300 صيدلية، وغلاوتك ولاواحدة فيها، تقولش بأدور على حوت بيرجع تاريخه كده للعصر الحجري، المهم ضربت سيجارة في التانية في التالتة، وكل صيدلية أدخلها ماألاقيش الدواء، اتصل بالدكتور - بالمناسبة هو صاحبي واستحملني كتير الليلة دي - وطبعا لو مش صاحبي ماكانش سألي في وسابني أرن حتى لو استخدمت كل وسائل الاتصال المعروفة، كنت باسأل نفسي لو أنا بانتمي للهنود الحمر في هذه اللحظة أكيد كنت هاأعمل زيهم زمان وابعت رسالة عن طريق الدخان لو السكك كلها اتقفلت، وطبعا ده برضه ماحصلش ، علشان أنا باكتب كتير وبابقى خيالي حبتين، المهم لقيت صيدلية كده مش باينة طالع منها نور خفيف قلت يمكن، استعذت بالله وهباه دخلت الصيدلية وكنت خلاص مش شايف، ضلمت قدام عينيه، وعفاريت الدنيا بتتنطط في وشي، الدنيا ضلمة جوا الصيدلية كمان ونور ضعيف جاي مش عارف من أي خرم في الحيطة، المهم لقيت الصيدلي ، طلعلي منين ماعرفش، قولتله على الدواء، هز راسه وملامحه ضايعه مني تماما وكنت باشد إيدي علشان تنزل على وشه لو قاللي لأ، لكن ده مش ممكن كان هايحصل برضه لأني عمري ماعملت كده، بس باحب اتخيل أحيانا إني أعمل كده،المهم خرجت الحروف منه بردا وسلاما وقال بصوت أجش( وطبعا فهمت إنه كان بيضرب حجر مشروب وطني في الأوضه اللى جوه وبالمناسبة المشروب الوطني ده بيسموه في بلاد الفرنجه الحشيش)، اتنحنح وقال موجود، قمت اتشاهدت، باضرب بعيني يمين، لقيت ست عجوزه قاعدة على كرسي بتتفرج على ورق كوتشينه في إيدها، كنت متأكد تماما انها مش شايفة حاجة، لكن كانت ملامح ابتسامة كده مستخبية على وشها، المهم غاب الصيدلي واضطريت اضرب سيجارة تاني وانا واقف، وعزمت عليها بسيجارة خدتها، ولعتهالها دون أن ننبس ببنت شفه - حلوة بنت شفه دي-، أخيرا وبعد طول انتظار، خرج المحروس وعلبة الدوا في ايده وابتسامة انتصار على وشه، ماعرفش ليه حسيت انه عامل زي ارشميدس بالضبط وهو بيجري ملط في الشارع والناس بتتفرج عليه وبيقول لقيتها لقيتها، كان المشهد كله سريالي، اكتملت حلقة السريالية بعد ماأخدت العلبة ودفعت تمنها وزياده كمان إكراما له، الحقيقة هو ماعملش حركة ممكن يبين لي منها إنه هو هايرجع الباقي، قلت فدا البنت، المهم وانا باجري على العربية لقيته متكوم جنبها على كرسي بعجلات، إزاي ماشفتهوش ساعة ماوقفت ، وفتحت الباب ودخلت الصيدلية، كنت ساعتها بافكر في دخان الهنود مش كده، كان بيبص للسما، كان جميل بشكل مرعب، لكنه كان بيبص للسما وبيبتسم، طلعت الست العجوز، السيجاره في بقها، مدت إيدها وسحبته قدامها بعد ماإديتله ورق الكوتشينة ، أكنه قفش على صرة دهب ، وبإيدين معووجه غريبة مسك الكوتشينه ورفعها للسماء وضحكته المكتومة طالعه زي العسل ، هما الاتنين ماشيين في عز الليل ناحية الميدان كأن معاهم تاج الجزيرة.।

فجأة لقيتني باضحك، باضحك عالي قوي، باضحك عالي قوي في ميدان العباسية

ونسيت اللي كنت بأفكر فيه كله

نسيت وانا بابص على جامع النور

اللي شهد كل آلامي

يسمع الآن ضحكتي

اللي نسيت بها كل الآلام اللي كنت باتكلم عليها

في صحتكم الضحك.. وماأشوفش فيكم ألم

24 comments:

fawest said...

الدنيا دى غريبه و عجيبه جدا
واللى يشوف غير كده
ميحسش بطعمها

فاكر لما قابلت الفراعنه فى التاكسى
واللا دخان الهنود الحمر الذى يستدعى بالتأكيد فتح المندل و الكوتشينه

اللى يشوف الجوانب الطريفه والغريبه دى فى الحياه يبقى مبدع و خيالى

ودى الحاجه اللى مصبرانا على قسوه الحياه

fatima said...

د. زين الغالى
سلامو تسابيح ألف سلامة
طمننا عليها
و عادى يا دكتور حالة الانظام اللى موجودة دى ....
و كل واحد يتصرف بقى بنفسه و هو و شطارته و واسطته و تساهيله
و حتى دا كله ساعات مينفعشى ...
و كالعادة ...اتكعبلت فى نماذج الحياة النابضةاللى بتخللى أى ألم بنحسه يتلاشى و يبقى و لا حاجة جنبهم
تسلامة الكتكتوتة حبيبتى
و تحياتى الخالصة يا فيلسوف

لماضة said...

اولا الف سلامة على بنوتك
ثانيا اللى بيشوف احوال الناس بتصعب عليه اكتر من نفسه
هي دي الحياة
مش في ادينا الا اننا نحمد الذي لا يحمد على مكروه سواه

زين said...

العزيز فاوستوس
مش كده بذمتك..
يحيا الخيال..
صورتك منورة ياعم أخبار الأدب..
أكيد عايزين في أخبار الأدب يجوزوك..
مش كده..
صباح فدادين الموز

زين said...

فاتيما الجميلة
وربنا أنا بأكتب قصة مش أكتر وحبيت أكتبها بالعامية.. بس طبعا فيه حاجات كتير حقيقية..
المهم تسلمي وتسابيح بتسلم عليكي جدا وبتقولك ابقي هاتي جو..
مساءك سكر

زين said...

العزيزة لماضة
ميرسي ياقمر على اهتمامك
وهي كويسة وبخير ماتقلقيش
بس المشكلة
إن مهما كان الأمر صعب عليك
فيه اللي عايش أصعب
مش كده
ده ببساطة اللي حبيت أقوله
ونورتيني ياقمر

sad_doraa said...

انا توهت

زين said...

سدوره
بعد الشر
ده لازم تأثير الثانوية العامة

MKSARAT SAYED SAAD said...

حياه هزلية بكل صورها
دمت بكل ود
سيد سعد

أم موني said...

أستاذي الفاضل وأبي العزيز

الف الف سلامة على توتي وحياتك من بعد ماخلفت عرفت اد ايه الضنا غالي وممكن علشانه نلف الدنيا كلها فعادي جدا انك تلف من الهرم للعباسية وكويس انك ماتجننتش في الطريق وريحتلك في العباسية كام يوم بسبب المهازل اللي البلد بقت فيها انت عارف اني بعيد بس باتابع وباسمع بلاوي تشيب بس نقول حسبنا الله ونعم الوكيل في اللي ضرب البلد وخربها وبهدلها بالشكل ده لدرجة انه خلاك تلف على مليون صيدليه علشان دوا للبنت الصغيرة العيانة نقول ايه بس
مااااااااااااااااااااااااااا علينا
بالنسبة لرؤياك المختلفة للامور انت عارف ده دايما بيحصل ليه لان كل انسان في الدنيا له 3 عيون عيونه الاتنين اللي بيشوف بيهم وغالبا كل الناس بتشوف نفس الحاجه زي بعض وفي نفس الوقت وعيون العقل اللي بتخلينا نحلل اي حاجه نشوفها بعقلنا وعيون القلب اللي امتعتنا بيها نجاة في اروع ماغنت ودي العيون اللي انت بتستخدمها كتير اجمل واروع واطهر وارق عيون في الدنيا عيون قلبك انت ربنا يسعد أيامك ويخليك لينا وعلى فكرة انا في انتظار مشروبك الموعود في شهر 7 بإذن الله
إلى أن نلتقي
مع خالص حبي واحترامي

زين said...

سيد سعد
شكرا يازعيم
مش كده برضه؟

زين said...

أم موني
أنا هاأبقى عندك يوم الجمعة اللي جايه لحد الخميس
لو حبيتي تعدي تنوري ومعاك أبو موني وموني وحماة أبو موني وحما أبو موني وخال موني
وصباح الموني

أم موني said...

تيجي بالسلامة ياجميل ياريت تبعتلي تفاصيل الزيارة وهاتكون فين وكل المعلومات على الميل او الموبايل ورحلة سعيده بإذن الله واشوفك بالف خير

Anonymous said...

ألف سلامة على توتة الامورة ربنا يشفيها ويباركلك فيها بجد انا اسفة اني مقصرة مع حضرتك جدا المفروض كنت اسال علشان اطمن على روح قلبي توتة بس والله ما كنتش اعرف والحمد لله على كل حال وديه رحمة من ربنا سبحانه وتعالى انك تروح العباسية وتشوف هذا المنظر الغريب الذي انساك الامك للحظات وزاد عندك الامل في ربنا سبحانه وتعالى ان في ناس حالتهم اصعب مننا بكتييييير ولكن الابتسامة والامل لا تفارق عيونهم ووجوههم وقلوبهم وهي ديه رحمة ربنا سبحانه وتعالى بعباده
تحياتي وسلاماتي وقبلاتي لتوتة الامورة
آيوتة

نبضات said...

شاهد وحيد على حياه لايعرفها احد !! توقفت امام هذه الجمله كتير اتاملها

الألم ..والضحك هذه هى الحياه كثير من الالم قليل من الضحك ومحاولة فى الاحتفاظ بالابتسامه مهما كانت ضغوط الحياه
الف سلامه على أميرتك الصغيره وربنا يحفظها لك دائما

تحياتى

زين said...

العزيزة أيوته
أشكرك على اهتمامك
وكله تمام
تحياتي وميرسي على الرسالة

زين said...

نبضات
رؤيتك الثاقبة تمنحنى احساسا دائما بأن هنك من يهتم
أشكرك لاهتمامك
شاهد وحيد على حياة لم يعرفها أحد
والله يسلمك

tharwat said...

كريم و الله يا دكتور زين في حساب الدوا
و دلوقت كمان الناس دى مشاربها كترت
انا قولت اكتب علشان حضرتك عزمت
ربنا يخليك لينا يا دكتور
و ألف سلامة لتسابيح

زين said...

ماشي ياعم ثروت
اخطف رجلك انت واحمد ناجح والعيال اللي عندك يوم السبت وتعالولي الشارقة
اتمنى تكونوا بخير
المهم كله تمام مش كده
تحياتي

tharwat said...

بقا تكون في الشارقة ومعرفش دى مشكلة يا دكتور
إن شاء الله هاشوفك
وحشتنا

OLED said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the OLED, I hope you enjoy. The address is http://oled-brasil.blogspot.com. A hug.

نوراى said...

د\ زين اية خبارك
يارب تكون كويس

المرة دى وانتا بتتكلم عن ميدان العباسية والهرم مش بتمنى انى ابقة فيهم ومش بقولك يا بختك لانى انا دلوقتى فى مصر بستمتع بكل حتة فيها

المهم مش هو دة الموضوع

اولا :- سلامة تشابيح ويارب
تكون دلوقتى احسن

ثانيا:- اللى يركز فى لناس وطريقة تعاملاتهم يا ما يشوف فية ناس كدة بتبقى مش مصدق انهم لغايت دلوقتى لسة موجودين فاجئة تلاقيهم قدمك مقضينها

ثالثا:- العصفورة قالتلى انك فى الامارات بجد كن نفسى ابقى متوجدة فى الامارات علشان اتعرف على حضرتك يا دكتور بجد معلش بقة الجيات اكتر من الريحات

ثالثا:- انا عايزة اجيب
كتاب حضرتك دماءابوللو

ومش عارقة اجيبوا منين ممكن انا رحت مكتبة الديوان بس مش لاقيتة ممكن تفيدنى يا دكتور

تحياتى ليك ولتسابيح

نوراى

زين said...

العزيزة نزراي
اشكرك على رسالتك وتعليفك
عموما لقاء دبي كان من أسعد اللقاءات في حياتي لأن كان فيه ناس كتير وبعدين انشاء الله عندي لقاء تاني على الصيف انشاء الله أشوفك هناك
وبالنسبة للرواية فهي للأسيف في ميريت بس لسباب متعلقة بالناشر نفسه ويمكن كمان عمر بوك ستورز
وهاأحاول أحطها في ديوان قريب بإذن الله
وممكن أبعتهالك في البريد لو تبعتيلي العنوان على الميل
خالص تقديري واحترامي

نبضات said...

صباح معطر بالورد والياسمين يادكتور
انا سعيده ان وصلك سلامى واشكرك على تعليقك الجميل فى البوست الاخير واسفه لتاخرى فى الرد على التعليقات لظروف امتحانات الدرسات العليا

وحمد الله على سلامتك ...نورت مصر
تحياتى