May 20, 2008

عن العبد لله!!



نزولا على رغبات الجماهير العظيمة - تقولش هتلر بيخطب- نبضات وفاتيما وكثير من الأصدقاء المدونين، نعلن نحن العبد لله واحد من صعاليك مصر المحروسة،
الممسوسة،
المهووسة بأن بطاقاتنا الشخصية
السرية
والعلنية
تحتوي على مايلي:

هواياتي : من الأفضل أن لاتكون لك هواية- بداية ماتطمنش خالص مش كده-، وإذا كانت لك هواية في كتابة الروايات زي حالاتي كده - ودي حاجة مزعجة جدا-، فالمشكلة ستكون أعمق في حياتك، لن تشعر بالراحة على الإطلاق، الثقافة فعل يجبرك على الصدام مع السلطة، ومع كل ماهو خارج عن ناموس الحياة، فعل تحريضي تماما، لكن رحمة الله واسعة إذ جعلني أعشق الموسيقى خاصة الكلاسيكية، والشرقي القديم، وأحلى هواية لي وهي هواية متركبة – تقولش مركبها في معمل-، حين أجلس في حديقتي الصغيرة استمع لعبد الوهاب أو باخ –سيان- وأجلس لقراءة عمل أدبي ,احتسي فنجانا من الشاي وسيجارة، ثم أغرق في التهويمات الداخلية، إنها اللحظة التي أنتظرها دائما فأنفصل فيها عن الحياة، وأعيش في عالم آخر ، أعيش حياة لايعلم عنها أحد شيئا، إنها لحظة حياتي الحقيقية التي لايعترف بها هذا العالم!
هواياتي الحقيقية:القراءة- الكتابة – الموسيقى -الشطرنج بحكم الجوائز اللي أخدتها-
ثانيا اشهر عيوبى : أستطيع ابتلاع كل أنماط الشخصيات، دون أن أملك القدرة على العصبية، في الليل، في الهزيع الأخير من الليل، يمكنني أن أبكي متخلصا من كل ماله من وطأة فوق قلبي، متسامح إلى الدرجة التي تجعل بعض الناس يشكون في قدراتي العقلية، لكني أحيانا، ماأكون ثورجيا فظيعا، حين أشعر بأن العلم أو الأدب قد تعرضا لطعنات من جاهلين، وحين أشعر بأن السلطة تستغفلنا.. السلطة من الآخر بتستغفلنا، برضه الاهتمام بالتفاصيل الصغيرة واللي بيجيلي على هيئة وسواس قهري، لأن الرواية هي الاهتمام بتلك التفاصيل.. لكني أيضا أتسامح!
ثالثا حاجات بكرها جدا.. أنا ثم أنا ثم أنا..نرجسي حتى في الكراهية
رابعا حاجات بحبها اوى ومش بمل من تكرارها: علي الحجار – عبد الوهاب- فيروز:أي ابتسامة أشوفها على وش أم حمادة فراشة مكتبي وهي بتدعيلي .. وتتمنى أن ترى ابنها مثلي ..بابقى عايز أقولها والمصحف انتي واخده في مقلب!
خامسا سؤال بيستفزنى جدا ؟ لما يجيني واحد طوله مترين وعمره تلاتين أربعين قول خمسي ستين سنه ويسألني أقرا إيه يادكتور عشان أبقى مثقف؟ بالذمة ده سؤال.. طبعا مافيش فايده أبدا؟
سادسا امنيتى فى الحياه : أن أكتب الرواية كأني أعزف وأن أعزف كأني أرسم.. وأن أرسم أساطيرا جديدة للعالم
سابعا حاجه مؤمن بيها جدا : أقدارك ترسم بقدر أطماعك..كلما كنت أقل طمعا في الحياة كلما كانت أقدارك رحيمة بك.. إعشقها تماما فتهبك ماتريد!!
ثامنا اكثر حاجه فاشل فيها: إني أعزف بيانو.أخدت ميت كورس ومافيش فايده..بس تعرفوا ألذ حاجة إنك تعرف إنك فاشل ومع ذلك تستمر ..هو أديسون أحسن مني يعني..فشل 1799 مرة..لما أبقى قده هاأبطل!
تاسعا وظيفه بحبها : كل حاجة اشتغلتها حبيتها..وكل حاجة حبيتها إديتني زي ماإديتها..الحاجة الأخيرة اللي عاوزها إني أتفرغ للرواية وكتابتها تماما وأن لاأعمل في أي شئ آخر!
عاشرا وأخيرا وصلت للنهايه مثلى الاعلى فى الحياه : دون كيشوت.. لأنه قاتل أوهامه قبل الحقيقة.. إذا استطعت أن تتغلب على خوفك وأوهامك ستكون أفضل انسان في الحياة!
امرر التاج الى
صديقى العزيز فاوست الفيلسوف الصغيرر
الفنان التشكيلي الصغير سيد سعد صاحب مكسرات
القاصة الجميلة المتمردة سهى زكي وياريت بنتها اللي تجاوب معلش بقى!
ابنتي وتلميذتي أمونة صاحبة مدونة شخابيط
مي بهاء صاحبة القصيدتين الجامدتين قوي صاحبة مدونة نص دستة

لمزيد من التفاصيل عني يمكن الرجوع للينك التالي :
http://www.awttar.com/modules.php?name=News&file=article&sid=1493

14 comments:

فاتيما said...

و الله البنت نبضات دى عاوزة جايزة مخصوص
لأنها طلبت منك تجاوب و أصرت إلحاحا
و برافو عليها شكلها من النوع المقاتل و انا معملتش كدا
لأنى حسيت إنك موش بتشجع حكاية التيجان دى عموما
بس كان مستحيل يجينى تاج و ميكونش اول واحد اهديهوله هو إنت !!!
يعنى إستعد حضرتك
أى حاجة تجينى بعد كدا هحدفها عليك
طوالى
و انت السبب
موش دخلت العالم دا على إيديك يا فيلسوف؟؟
الإجابات على التاج كما توقعتها منك
فريدة و صادمة و صريحة
ليك حق تغرم بالموسيقى و تحاول تتعلمها و بمناسبة على الحجار اللى بيجمعنا حبه
أنا اختارتلك غنوة ليه فى مدونتى حسيت كدا إنها شبهك قوى
و يا رب تكون بتلمس حاجة عندك أى كانت
أما حكاية الكراهية دى بقى
فموش عارفة مين اللى قال كدا بالظبط بس أقتنعت بيه قوى
أن الحب الشديد و الكره الشديد وجهان لعملة واحدة
أسمها الاحساس
يعنى أهم الواحد ميبقاش حيادى فى مشاعره و قلبه يبقى فاصل شحن
أحييك على من مررت لهم التاج
إيمان حبيبتى و بحس إنها بنتى
و سهى القلب الكبير
و سيد المكسرات فناننا العزيز
و فاوست أبو دماغ لوحده كدا
و ميومة البهية الرقيقة الجميلة
عارف بقى الشىء اللى بيفرحنى
إن أحبائك كلهم هما كمان أحبابى
يا دكتور زين
أقولك إيه بس ...
و لا بلاش
إنت عارف من غبر ما أقول ...

maii bahaa said...

والله يادكتور القعدة بتاعة الجنينة اللي حضرتك واصفها دي ..طول عمري باحلم بيها وبجد ممكن تغني الواحد عن كل متع الدنيا ويبقى مبسوط بالقوقعة اللي حاطط نفسه فيها..كمان كان نفسي أعملها فوق سطوح عمارة تكون صغيرة في وسط البلد..واعمل فيها اجتماع كل اسبوع مع الناس الحلوة اللي زي حضرتك ونتبادل الآراء والكتب ونشرب أحلى شاي بالنعناع
يااااه ..المهم حضرتك جاوبت عالتاج أخيرا بعد ماناس كتير طلبوا ده
والإجابات قذائف مباشرة إلى القلب
لصدقها الشديد
متشكرة على حاجات كتير منها إطراءك على شعري وده مخليني طايرة بجد
والتاج للأسف جاوبت عليه من كام بوست كده ولكن ذكرك إسمي له عندي برضه معنى حلو أوي
ألف شكر وماتنساش ان الستات رغايين بطبعهم
كانت معكم مي بهاء
الكاهرة

- أبوللو- said...

وهذه أيام نداولها بين الناس
أولا من ساعة مابعتيلي وانا بأفكر صحيح رفضت بس بافكر..خايف أقول إيه وماقولش غيه..نبضات بقى أصرت مرتين بعدها على طول ..قلت هو عمر ولاأكتر..ومن غير ماتقولي كله واصل ياواصل..
لما قلتيلي ليه حطيت دي لعلي العجار وإنها مش ماشية..مارضيتش أقولك إن الأغنية دي عامله زي عباية جدي ألبسها على أي حاجة..بدلة بيجامة شورت..كله ماشي معها..ليه لأني بحبها وحاسس بيها..بتوصل كل الاحساسات ..وكفاية صوت علي لو قال ريان يافجل هاسمعه..
نورتيني والله ياأم جو..لم أعد قادرا على الزيارات الكثيرة بسبب بعض الآلام..فسامحيني لكن بحاول على قد ماأقدر ..خالص محبتي لكي ولحبيب ألبي جو

- أبوللو- said...

حبيبة ألبي
مي بهاء
معلش جت آوت لأني ماباعديش كتير
أنا مازلت عند غصراري يوم ماأعمل ندوة ساقية الصاوي هاتيجي وتسمعينا القصيدتين الجامدين قوي دول..
وانشاء الله نوسع قاعدة الجنينة ونعزم كل الناس قريبا جدا انشاء اللهوتنوري واللهي يامي
محبتي وتقديري

hamsaa said...

جميلة بطاقتك جداوبالذات ان من بين اللي بتحبهم فيروز واكيد ام حمادة الست دي نظرات عينييها وكلماتها تشع حب في حب
انت تستحق تيجان الدنيا كلها بحالها
بس انت مش نرجسي خالص انت بتفكر في الناس اكتر ما بتفكر في نفسك
شوفك كلك علي بعضك بعيوبك ومزاياك جميل
مبروك علي التاج يا قمر

نبضات said...

صباح معطر بالورد والياسمين يارب اكون اول التعليقات بصراحه اجاباتك للتاج جميله جدا مدهشه عجبتنى اووووووووووووى وكانت مفجاه فى انها متميزه جدا وتلقائيه وغير تقليديه خااالص بس اول ماشفت البوست ضحكت ضحك عشان التاج مش شرط يكون زى ماانا كاتبه الهويات والعيوب..... وهكذا. التاج عباره عن اى 10 حاجات عن الشخصيه بس انا عملت شكل معين للتاج بتاعى وكنت حساه سخيف جدا ولما حضرتك عملت نفس البدايات حسيت انى كان المفروض اوضح اكتر لك انهم اى 10 حاجات وبس عموما دا شرف ليا . سعدت جدا لقبولك للتاج ولاجاباتك المميزه جدا والتى استمتعت كتير وانا بقرائها وضحكت كتير برده وقدرت تعرفنا حاجات جديده ودقيقه عن شخصيه شاهد على حياه لايعرفها احد الجمله ديه بحساها متماشيه مع شخصيتك المتامله الفلسفيه العميقه المميزه

اذا استطعت أن تتغلب على خوفك وأوهامك ستكون أفضل انسان في الحياه

عجبتنى جدا هذه الجمله لانى اؤمن بها

تحياتى
اشكرك بعمق على قبول التاج
سعيده بمعرفتى بيك وبمدونة تسابيح

- أبوللو- said...

همسة الجميلة
شكرا على كل حاجة وعلى إيمانك اللي مش عاوز يتزعزع.. وأم حماده بتسلم عليكي وبتقولك تشربي شاي!ولا لمون!
ربنا يخليكي ومايحرمنيش من كلامك المشجع دايما
أخجلتم واللهي تواضعنا
تحياتي ياقمر

- أبوللو- said...

تم..تك..بم
نبضات
مش عارف أقولك إيه..بس حاسس إنها كانت ورطه حلوة..
عموما..من كل ألبييييي باشكرك..وأنا عارف إنك في امتحانات وانشاء الله تعدي على خير..أنا لقيت إن الأسئلة إنتي كاتباها بطريقة عجبتني وتختصر مسافات كتير ففضلتها كما هي..وده بيؤكدلي إن مساحة الشفافية والاحساس عندك قماشتها واسعة جدا..
وسعادتي أنا أكتر واللهي..ربنا يديم المحبة والتفاؤل..
الحياة جميلة بيكي وبفاطمة وكل اللي منورين الحزب الراديكالي الجديد للثقافة المصرية..هذا ماأعتقده شخصيا ومقتنع بيه..الثقافة الجديدة لمصر جايه من المدونين مش من الصحافة وكتاب السلطة والتليفزيون..الخروج عن المألوف إنتم بأفكاركم وجمالكم واصراركم على إعادة الدماء للثقافة المصرية..بدون تنميقات ولا مهلبية...
صباح الفل والورد والجمال والياسمين

إيمان said...

يا دى الهنا إسمى مكتوب
حضرتك عارف وقولتلك قبل كده
إنى لما حد لما كان يقولى ويدلعنى بأمونة بضايق بس منك بجد يا دكتور خلتها اشيك وأجمل وبقيت أحبها....
لدرجة لما بتنادينى يا ايمان
بحس انك زعلان منى......

إجابات زدتنا فهما لانفسنا...
على فكرة ..انا بردو نفسى اتعلم بيانو بس للأسف عمرى ما حاولت...

حضرتك من أدخلتنى عالم التدوين ومن قبله عالم الانترنت...ودلوقت أول وأهم حد يمرر لى تاج...حاضر هجاوب
ولازم تيجى تعلق وتصحح وتدينى امتياز زى زماااااااااان

تحياتى ومحبتى

dodda said...

انا مش عارفه اعلق على ايه والا ايه
!!!

* حتة الجنينه تجنن لا يشوبها الا سيجاره

* شايفه ان التسامح الفظيع ده لا يتماشى معه النرجسيههه..بلاش افترى على نفسك
..
* الله يكرمك يا دكتر خلى ام حماده تدعيلى

* ربنا يحقق امنيتك بتاعت سادسا وانا فى انتظار اساطيرك

* الاقدار والاطماع والعلاقه الطرديه
الحمد لله الذى انعم علينا بنعمة الرضا بالحال
*انا دراسنى الاصليه هى الموسيقى ولوسمحتلى انصحك..حاول مع القانون بدل البيانو وحتدعيلى
*ياريت كل الناس تاخدك قدوه قى حبك للشغل وبكده الانتاج يزيد والناس تبقى مبسوطه

*حفضل مش على بعضى احد ما مى بهاء ترد على التاج ده

دمت كما انت ..بما نعرفه عنك ولا نعرفه

- أبوللو- said...

أمونة العزيزة
أنا مستني أهو..
مستني
مستني
مستني
تحياتي ومحبتي

- أبوللو- said...

دودا
من يوم ماشفتك وأنا باقول انك دماغ قد كدهو..
ماشي بس هو لسه فيه حد بيصنع آلات قانون..
هاأحاول ربنا يسهل..
تعليقاتك تحفة..صباح الفل

MKSARAT SAYED SAAD said...

صاحب الدماء الابوليه
تسلمت دعوتك يا ملك الشمس
بجد سعيد جدا انك دعتنى للتاج
وشاكر لفاتيما ام يوسف على تعليقها
بالمناسبه ايوه يا دكتور التصميم انا اللي عملته
اوعى تنسي فضلك عليا بعد الله سبحانه وتعالى
بجد اعتز بك حتى النخاع
والتاج يا فندم دخلته الفرن وان شاء الله يوم الحد يكون نازل على المدونه
عندي
دمت بكل محبه وهدوء بال
صاحب المكسرات
سيد سعد

- أبوللو- said...

صاحب عربة عرب شبرا والمحمدي
تسلم تصاميمك الجميلة
ويللا شد حيلك ياملك القمص
صباح الفل